Работење на фондовите

Уплати во фондовите

Како да станете сопственик на удели?

Пресметковните единици кои се користат за да се утврди противвредноста на вложените средства се нарекуваат удели. Нивната цена се пресметува на дневна основа, согласно пазарната вредност на сите финансиски инструменти од портфолиото на фондот.

Инвеститорот станува сопственик на удели од еден или повеќе фондови со извршување на уплата на трансакциската сметка од соодветниот фонд.
Кога инвеститорот ќе изврши уплата на сметката на фондот, уплатениот износ, намален за таксата за издавање на удели, се дели со пресметаната цена на уделот за денот на кој е извршена уплатата. На тој начин се добива бројот на нови удели кои ги стекнал вложувачот. Вкупниот збир на удели кои ги поседува вложувачот, помножени со дневната цена на еден удел, ја изразуваат паричната вредност на неговата заштеда.

Доколку инвеститорите паричните средства за купување на удели ги уплатат во текот на денот (Т) до 24:00 часот, истите купуваат удели според вредноста на уделот на ден (Т) по непозната вредност. За уплатата извршена по 24:00 часот, уделите се купуваат според вредноста на поединечниот удел на наредниот ден (Т+1), исто така по непозната вредност.

Со пополнувањето на пристапница, секое физичко или правно лице може да пристапи кон Фондот и да извршува трансакции со удели. Пристапницата се пополнува на посебен формулар, изготвен од Друштвото за управување, во кој се содржани идентификациски и контакт податоци за вложувачот, како и писмена изјава со која тој изјавува дека е запознат со правилата на работење на Фондот, односно со Статутот и Проспектот и дека истите во целост ги разбира и прифаќа. Во постапката за идентификација на странката, ополномоштувачот или вистинскиот сопственик, Друштвото за управување ќе ги применува одредбите од својата Програма за определување правила, процедури и упатства за примена на мерки и дејствија за спречување на перење пари и финансирање на тероризам. Формуларите можат да се подигнат и пополнат секој работен ден во деловните простории на Друштвото за управување, како и преку продажната мрежа воспоставена на договорна основа.

Во зависност од можностите и целите, можете да одлучите дали ќе вложите еднократен износ на средства кои ќе ги оставите да се оплодуваат на долгорочен период или пак ќе вложувате постепено и континуирано. Секако, можете да направите и комбинација од двата типа на вложување.

Еднократни уплати

Еднократна уплата за купување на удели претставува секоја уплата на сметка на фондот извршена од страна на инвеститорот без претходно дефинирана динамика. Секој инвеститор кој има намера да вложи преку еднократна уплата потребно е до Генерали Инвестментс АД Скопје да поднесе Барање за купување на удели во кое ја посочува сумата која ќе биде уплатена.

Програмирани уплати

Програмирана уплата за купување на удели претставува секоја уплата на сметка на фондот која е извршена на основа на склучен програмиран план. Програмираниите планови претставуваат специјално креиран систем на тековни уплати во фондот. На овој начин можете да започнете со уплати во некој од нашите фондови, веќе од 500 денари месечно, со активирање на траен налог во банката во која ја примате Вашата плата или добивате приходи по друга основа.

Програмиран план се активира со поднесување на Барање за купување во кое се посочува избраниот тип на програмираниот план. Барање за купување кај програмираните планови се поднесува само еднаш, односно при првата уплата на средства за активирање на планот.

   Програмиран план со дефиниран износ – тип 1

Програмираниот план тип 1 е наменет за вложувачи кои сакаат слобода при изборот на временскиот период, износот и динамиката на вложувањата. Кај овој тип на програмиран план, вложувачот има право на надомест на наплатениот влезен надоместок за издавање на удели, согласно условите во договорот за постепено вложување.
Основен параметар при креирањето на планот е одредување на вкупниот износ на парични средства кои постепено ќе бидат вложени во фондот.

Предностите кои ги нуди овој тип на постепено вложување се следните:

• Планот временски не е ограничен, што значи дека вложувачот може да си уплаќа кога сака и по колку сака.
• Планот се исполнува кога ќе биде достигнат вкупно договорениот износ;
• Не се наплатува излезен надоместок при повлекувањето на заштедата;
• Наплатениот влезен надоместок во целост се надоместува по исполнувањето на условите од договорот.

   Програмиран план со дефиниран период – тип 2

Програмираниот план тип 2 е наменет за лица кои сакаат да вложуваат редовно и долгорочно, без административни трошоци и без ограничување на вкупно уплатените средства.
Кај овој тип на програмиран план, вложувачот е целосно ослободен од наплата на влезниот надоместок за издавање на удели.
Основен параметар при креирањето на планот е одредување на рокот на негово времетраење, кој не може да биде пократок од 10 години.
По исполнувањето на условите од договорот за постепено вложување, вложувачот се ослободува и од наплата на излезниот надоместок за откуп на уделите.

Предностите кои ги нуди овој тип на постепено вложување се следните:

• Износот на планот не е ограничен, што значи дека секој вложувач уплаќа согласно сопствените можности.
• Планот се исполнува по истекот на договорениот период;
• Не се наплатува влезен надоместок;
• Доколку се исполнети условите од договорот, не се наплатува ниту излезен надоместок.

Пресметка на цената на удели

Нето вредноста на имотот на Фондот по удел е нето вредност на имотот на Фондот поделена со бројот на уделите на Фондот на денот на вреднување. Ден на вреднување e денот за кој се пресметува нето вредноста на имотот на Фондот. Денот на вреднување (т-1) му претходи на денот на пресметка (т) во текот на кој што се пресметува нето вредноста на имотот на Фондот.

Вкупниот број на удели на Фондот се пресметува и изразува во четири децимални места. Сите зголемувања и намалувања на бројот на удели во Фондот се пресметани и изразени во четири
децимални места. Нето вредноста на имотот на Фондот и нето вредноста на имотот по удел се пресметува секој работен ден до 16:00 часот за секој ден од годината.
Пресметувањето на нето вредноста на имотот по удел се врши согласно Правилникот за утврдување на нето вредноста на имотот на отворен и затворен инвестициски фонд и за пресметување на нето вредноста на имотот по удел или по акции во инвестицискиот фонд, донесен од страна на КХВ.